راسك بوجعك؟؟؟ طيب خلينا نشوف الاسباب

 

وجع الراس عاطل وبخلينا نعصب ونفقد تركيزنا ونضرب بووز ونحس انه الدنيا سكرت وبصراحه في عوامل بتخلينا نعصب او راسنا يوجعنا او نحس انه الدنيا او نفسيتنا مش كويسه تعو نشوف:

1.شاشات 3 D او ثلاثية الابعاد: كل الدراسات عم بتاكد انه هالشاشات الها دور كبير بوجع الراس وخصوصا انه كثير منها بيعاني من خلل بالتصنيع او بالتردد وهالمشكله بتزيد مع الناس اللي عندهم مسبقا مشاكل بالنظر.


 

2.الوقت اللي بنقضيه امام الشاشات: آه الله يكون بالعون من الموبايل للكمبيوتر للمول للاي باد للابتوب للتلفزيون. بصراحه حياتنا صارت كلها شاشات وكل هاي الشاشات بتاثر على نظرنها وبتسبب النا كثير وجع راس.


 

3.الازمات الاقتصاديه: التفكير بالمال او بالمستقبل او لما نفتح المحفظه وما نلاقي فلووووس او لما نشوف الرصيد ونلاقيه فراطه بس او لما يكون بدنا نعمل اشي وما نقدر نعمله .....كمان وجع راس.


 

4.الضجيج: اخر الدراسات كمان بتاكد انه الضجيج والاصوات العاليه مش بس بتوجع المخ بتقلب المخ قلابه.


 

5.شرب قهوه زياده: لانه الكافيين بيوجع الراس والمشكله انه اذا بنحاول نخفف قهوه كمان رح نتعرض لفتره صغير لام في الراس ولكن هالالم بس موقت فكثير ناس مشان ما يتحملوا هالالم الموقت بستمروا لالقهوه وبزيدوا عليها منتجات معبيه سكر فبتكبر المصيبه وبزيد تاثير الكافيين مع السكر وبندخل بحلقه مفرغه.


 

6.التشتت: لما يكون عنا كثير اشيا لازم تنعمل الطبخ والبيت والشغل والاولاد ببكو والدنيا فوقاني تحتاني ومو ملحقين من وين نبلش وبنروح من شغل لشغل وبيتاثر ساعات نومنا فاكيد حيصيبنا وجع راس من كل هالضغوطات والمشكله بتكبر مع قلة النوم.


 

7.الاضواء القويه: نحاول نتجنب الاضاءه القويه لانه بتاثر على عيوننا وزي ما قراتم انه الاضواء عموما والاصوات والتفكير والتشتت كله بوجع الراس فخلينا نحاول نبعد عن هالاشياء وننظم امورنا لنعيش حياه بدون وجع راس ...... نحاول وان شاء الله بنقدر

 



مقالات ذات صلة